Matthew 13

'Ina 'Oji'inijihuni Haa

(Maka 4:1-9; Ruku 8:4-8)

1Ijí veaka nikwinu'ina kajiano Jesuho ijí sea kajaho are'i kaivo va'e soha rori hinana. 2'E'eme niho'o ea mapoka rarena jihuna'e Hu va'e sisima vaji ajima asuma hinana. 'E'ejume ea mapoka ijí soha rori namijara. 3'Ejumakivi'i Hu sisima vaji namine uneunechaka mapokijija hai najahana. 'Enarena ijá 'iama Ea pina va'e 'ina 'o'iro va'ana. 4'E'eme 'ina 'aho'a 'unamu 'ahi arihume ukapo ro ijara. 5'Ejume 'ina 'aho'a muna 'ahi mwe'a ma'uako namaji arihajija marako'a riavara kaivo chinuma jojora parejara. Ijihuni maijaho muna 'aha mwe'a ma'uako namana. 6'E'eme vei 'e'una rena ijaho chinuma jojora pa'ana'omo 'anie sarasahara. 7'Ina 'aho'a ija sisei vaji arihajija riame ajivara kaivo ija sisea ka'ene oma rukina kajipo raorihume siserasahe 'ina parejara. 8'Enakaivo 'ina 'aho'a mwe'a mai 'ojajaho riame marasahe 'ina 'aho'a mapoka (30) rejume 'aho'a mapoka mapoka (60) rejume 'aho'a niho'o mapoka mapoka (100) rejara. 9'Enakúne irara ataa rukina re'amajaho ataa apúsame he'amana 'iamana.

Haa Kajihuni Maijina

(Maka 4:10-12; Ruku 8:9-10)

10'Ejumakame Huni tisaiporuepo roe Jesu apome ijá 'wava A iraka vene pu vu'a 'waramujaho haaru 'waramo? 'wavara. 11'Ejume Hura pu ijá 'iama Ja Huni arijihuni hemijaho najahume ja nihena kavara kaivo pu mai'o pahene pakavi'ina. 12Ea pina hu 'aho'a na'eje 'aho'a 'u'o 'ekuna. 'Eje ea pina huna poku pana'avajaho maho'o 'etujahuna. 13'Enakaivo Nara haa ka'ene 'waravujihuni maijaho ikena. Pu kavu kaivo ijihuni maijaho pakavu. 'Ene pu heju kaivo ijihuni maijaho pahene pakavu. 14Nitama poropetia ka'ene Aiseana 'wavujara Godoni ira vaji pu rona 'waramajaho nimai renu.

Ja hehuna kaivo ijihuni maijaho pahehuna. 'Ene ja kahuna kaivo ijihuni maijaho pakahuna.
15Ijihuni maijaho ea kehipuni ojijaho niho'o kisina rejara. 'Ene puni ataijaho tanumajihuna'e pu hami paheju. 'Ene puni niijaho tanurihu'e pu pakivu. Ijihuni maijaho pu vejuro'i puni nia 'ee ataa jarae 'ee puni oja jarae hene veje pu ta'arohakame Nara veje pu sonahihuna 'wamana.
16'Enakaivo joni nia merajihukame niriara. Ijihuna'e ja kihuna. 'Ene joni ataa jaraajihuna'e ja heju. 17'Enakúne hami vwihanana'avara. Poropetia 'ee ea arira mapoka'e ura jara uneunechaka kima hejujihi kima he'i 'ahiara kaivo pu pakima pahejara.

Jesura 'Ina 'Oji'inijihuni Haiji Nahama 'Waramajina

(Maka 4:13-20; Ruku 8:11-15)

18'Enakúne 'ina huni haijihuni maijaho he'avara. 19'Ina ka'ene 'unamu toi arihajihuni maijaho ikena. Pu Godoni arijihuni vu'a hejura kaivo ijihuni mai pahejura. 'Avena siseijara roare'e Godoni ira ka'ene puni oja vaji namujaho 'etujiha 'ato'arumuna. 20'Enakaivo 'ina ka'ene muna 'ahi arihajija ea hu Godoni vu'a iviamaa kakaro henujaho hu niho'o teama'eju'e 'ekuna. 21'Enakaivo 'inijaho niho'o oja vaja chinuma pasamana'omo Godoni iriji nimai rojujihuni hahi unenu'u pini sisea puni haha 'ahi renaujaho pu marako rana 'o'uju'e ani va'una. 22'Ene 'ina ka'ene ija sisea vaji arihajaho ea hu Godoni vu'a henu kaivo uneunecha ka'ene mwe'a kehunijiru vwihane 'ee monia 'ekahuni 'unamijara pisiviu'e Godoni vu'a kajaho veurahu'e maa parenuna. 23'Enakaivo 'ina ka'ene mwe'a mai arihajija ea hu Godoni irakaho hene 'eka venuna. Ea 'aho'a niho'o mapoka mapoka (100) reju'e ea 'aho'a niho'o mapoka (60) reju'e ea 'aho'a mapoka (30) rejura 'iamana.

Ija 'Ee 'Witi Puni Haijina

24Vukú'o Jesura haa pina 'waramarena ijá 'iama Godoni arijihuni maijaho areri ei pini 'ina ka'ene mamaiji 'eka va'e 'onuja'ina. 25'Enakaivo ea mapoka noturana'eme huni naki pini 'ina sisea 'eka roe 'witia vaja kajiano ato'aruma va'ana. 26'E'eme ijí 'witia kajaho ritati 'anae maa re'eme iji'a ijihuni vaji ija sisea kajihuni 'ina 'u'o 'urina samaahiramana. 27'Ejumakame ea kajihuni pwehipo roe ea kajaho ijá 'wava Natohwe! A 'ina maaru juasi'a kajaho 'onana kaivo 'ú ija siseakaho ichá rene roe ijaho 'urijare? 'wavara. 28'Ejume hura ijá 'iama Nuni nakapo raki 'eka roe 'ojara 'iamana. 'Ejume pu hu apome ijá 'wava 'Ena'omo núra va'e ija sisea kajaho jahekuhuna ura renau 'wavara. 29Hu eha vene ijá 'iama Oo ja iviamaa ija sisea kaji jaheju roji'i 'witia kaji jahe'avarono pajahe'eja. 30'Enakúne maka'eje 'ina kajaho ajive ija sisea kaji 'u'o ajimuva'o 'ina kajaho tuvakavi'i iji'a nara ea 'aho'a 'ekakame ijipo ija sisea kajaho jaheji'i useakame 'eka va'e veni jahuna kaivo 'witia kajija tairevi'i irechahuna 'iamana.

Kwava 'Ina Huni Haa

(Maka 4:30-32; Ruku 13:18-19)

31'E'ikaivo Jesura vukú'o haa pina ijá 'iama Godoni arijaho areri kwava 'ina sa'ina. 'Ena'omo emai apena va'e huni juasi'i 'onamana. 32'Inakaho niho'o ma'u'umaa. 'Ena'omo riamare'e niho'o icha natohwa'e reju'e ukapo roe ijihuni anuama 'ahijino nesa vene hijura 'iamana.

Isiti Huni Haa

(Ruku 13:20-21)

33'Ene vukú'o Jesuho haa pina 'waramana. 'Enarena ijá 'iama Godoni arijaho areri napari isitia ka'ene harava 'eke puretia venare'e 'onahukame hwena ajivuja'ina 'iamana.

Jesu Hai 'Eki'i Vu'a 'Waramana

(Maka 4:33-34)

34Jesura uneunechaka mapokijija ea mapoka haaru 'waramana. 'Enakaivo Hu ea kajija vu'a pina niho'o ma maha pa'waramana. 35Hura ija'ina venajihuni maijaho nitama poropeti raka ka'ene 'waramajara nimai nimai re'amarono avanana. Ika'ina 'waramana

Na vu'a 'waravuri veijaho haaru 'warahuna. 'Ene Nara vu'a ka'ene 'wara'ujaho nitama akúpa mwe'a mai'o paveji'ini hemi ea pahena pakivajihija'e 'warahuna 'iamana.

Jesura Ija Huni Haiji Nahama 'Waramana

36'Enarena Jesuho ea mapokijija irechami'i kaivo sei vaji va'umakame Huni tisaiporu va'e apome ijá 'wava 'Ina ka'ene juasi'i 'o'eme ija siseiji'i 'urijajihuni maiji 'waruma 'wavara. 37'Ejume Hu ijá 'iama Ea ka'ene 'ina maa 'ona 'onujaho Emaa Puni Harihijina. 38'Enakaivo juasi'ijaho ike mwe'akena. 'Ene 'ina ka'ene mamaijija ea ka'ene Godoni eijihina. 'Enakaivo ija siseijaho 'avena siseijihuni ehijijihina. 39'Enakaivo naka ka'ene roe ija sisea 'onajaho 'avena siseijina. 'Ene 'ina kajara tuame areri re'amajaho mwe'akara pa'arehuni urijina. 'Ene juara kajaho ona oji'inapo sahuna. 40'Ena'omo ija sisea nianae veni jauja'ina mwe'akara pa'are'amani veijino ija'ina'e jahuna. 41Emaa Puni Harihijara Huni ona oji'ina irechamie ijipo mwe'a kakino ea ka'ene emaa venau'e sisea vejujihija 'ee sisea veji'ina kajija nianae 'ekahuna. 42'Ejakame 'eke ato'aruma'e vena ka'ene niho'o ani'ina vajijino renareje niramarume kuchikuchivi'i upaja chanichanivi'i nahuna. 43'E'eje Godoni eijija puni Omijihuni ari vea puna'i risa'eje hihuna. 'Enakúne ea ka'ene ataa rukinijija ataa apúsame heha.

Kukua Ka'ene Hemi Navujihuni Haijina

44Godoni arijaho areri monia'e ea 'ahopo juasi'i apúrinanavu'e namuja'ina. 'Ena'omo ei pini va'e kamarena vukú'o apene ani apúrinana'i kaivo hu niho'o teama'eju'e va'e huni uneunecha mapokijijahija ea 'aho'a'e 'imena ranavume hu monia kajino apena va'e juara kajaho 'imenana.

Perua Huni Haa

45'Ene kú'o Godoni arijaho areri ea ka'ene perua saramuja'ina. 46'Enuva'o kwinu'wi kamare'e va'e huni uneunecha mapokijija ea 'aho'a 'imena ranavume hu monia kajino apene perua kajaho 'imenana.

Namea Huni Haa

47'Ene Godoni arijaho areri namea'e soha vaji 'onamare'e kija ani ani'ina siriravuja'ina. 48'Enare'e namea kajaho itu'o'ujukavi'i unama tairia roe rori rana'i kaivo kija ka'ene mamaijija nianae katija vena use'i kaivo siseijija ato'aruvara. 49'Ena'omo vea ka'ene mwe'akara pa'are'amani veijino Godoni ona oji'inapo roajimareje ea sisea ka'ene Godoni eijihipuni vaji hijujija ahaahuna. 50'Ene 'eka va'e vena ka'ene renujino ato'aruve ijí renareje kuchikuchime 'ee niramarume upaja chanichanivi'i nahuna 'iamana.

Vu'a Sahasa 'Ee Maiu'ina Nimaa Nimaijina

51'E'ikaivo Jesura pu aporama ijá 'iama Ja ike uneunecha ka'ene Nara 'waravukehi puni maijaho ja niheju 'iavume pu ijá 'wava 'I'a nú niheju 'wavara. 52'Enajihuni hahi Sikuraipia ka'ene Godoni arijihuni tisaiporua rejajija areri aachia anesura'omo ijí puni aachi'a vaja kajino uneunecha maiu'ina 'ee sahasa 'eka rouna 'iamana.

Jesu Nasareti Vaji Pataarohajina

(Maka 6:1-6; Ruku 4:16-30)

53'Ejume Hu haa kajaho 'waravume pa'arejume ijí ruha kajaho are'i kaivo 'urina va'ana. 54'Enarena Hu va'e Huni ari 'e'une ijino puni Sinakoku vaji pu najahumakame Hura vu'a ka'ene 'waramaji ea henareja niho'o oja hwa'usunahara. 'Ejuma kamareja pu ijá 'wava 'Ú ike vu'a anejakaho Hu ichihi apenane? Hura uneunecha ka'ene ea areri pavejura ka'ene venajaho ichihi apenane? 'wavara. 55'Ú Hu kapinita ijihuni Hariha pana raka? 'Ene Meriho Huni oha pana raka? 'Ene Jemisi ho Josapi ho Saimani ho Juta ho ijá Huni 'u'uhija pana raka? 56'Ene Huni ma'ipija mapoka'e iki hijura raka? 'Ú ea ikaho ichihicha harura kajaho apenane? 57'wa'i kaivo pu Hu pataarohara. 'Ejumakame Jesura ijá 'iama Poropetijaho eaka mapoka ka'ene kwaka mapokakino hijujija Huni ira hena ta'arohuna kaivo ea ka'ene Huni ara anemai hijujipo hena pataarohura 'iamana. 58'Ejume Huni arijino uneunecha ka'ene ea areri pavejura ka'ene ijí mapoka pavenajihuni maijaho pu panimai rojumakame ijihuna'e avanana.